திஹார் சிறையில் தூக்கு ஒத்திகை: புதிய மனு அளித்த நிர்பயா குற்றவாளி

டில்லியை சேர்ந்த மருத்துவ மாணவி நிர்பயா, 2012ல் ஒரு கும்பலால் பாலியல் பலாத்காரம் செய்யப்பட்டார். மருத்துவமனையில் சிகிச்சை பலனின்றி உயிரிழந்தார். இந்த வழக்கில் முகேஷ்சிங், பவன்குப்தா, வினய்சர்மா, அக்ஷய் குமார் சிங் ஆகிய நான்கு பேருக்கும் தூக்கு தண்டனை விதிக்கப்பட்டது. மூன்று முறை தூக்கு தண்டனைக்கான தேதி ஒத்திவைக்கப்பட்டு, மார்ச் 20ம் தேதி அதிகாலை 5.30 மணிக்கு தூக்கில் போடுவதற்கு நீதிமன்றம் உத்தரவிட்டது.

இதற்கிடையே தண்டனை நிறைவேற்றப்படுவதை தாமதப்படுத்தும் நோக்கில், குற்றவாளிகள் மாறி மாறி மனு தாக்கல் செய்து இழுத்தடித்தனர். அனைத்தும் தள்ளுபடி செய்யப்பட்ட நிலையில், நேற்று (மார்ச் 17) முகேஷ்சிங், டில்லி கூடுதல் செசன்ஸ் நீதிமன்றத்தில் புதிய மனு தாக்கல் செய்தார். அதில், 'பாலியல் பலாத்கார சம்பவம் நடந்த அன்று, நான் டில்லியில் இல்லை. ராஜஸ்தானில் இருந்த என்னை, போலீசார் பிடித்து வந்து, இந்த வழக்கில் சேர்த்து விட்டனர். எனவே, எனக்கு விதிக்கப்பட்ட துாக்கு தண்டனைக்கு தடை விதிக்க வேண்டும்' என, தெரிவித்திருந்தார்.
இதனை விசாரித்த நீதிபதி, தண்டனை நிறைவேற்றுவதை தாமதிக்கும் நோக்கில் மனு தாக்கல் செய்யப்பட்டுள்ளதாக கூறி தள்ளுபடி செய்தார். இந்நிலையில் இன்று டில்லி உயர்நீதிமன்றத்திலும், 'சம்பவத்தின் போது நான் டில்லியில் இல்லை' என மனுத்தாக்கல் செய்துள்ளார். இந்த வழக்கு இன்று விசாரணைக்கு வருகிறது.